السلات المتروكة: كيف تقللها بنصوص صفحة الدفع في متجرك الإلكتروني

السلات المتروكة في المتجر الإلكتروني تقل لما تكون نصوص صفحة الدفع واضحة: زر يقول للعميل وش بيصير بالضبط، تكلفة كاملة تبان من أول خطوة، رسائل خطأ تعلّمه كيف يصلّح، وسطر ثقة جنب طريقة الدفع. هذا هو شغل كتابة تجربة المستخدم في صفحة الدفع، وهو أرخص تحسين ممكن تسويه في متجرك.

العميل وصل للسلة، يعني اقتنع بالمنتج. اللي يضيّعه بعدها غالبًا مو السعر، يضيّعه سؤال ما لقى له جواب في الشاشة. وفي هذا الدليل بنمشي على نصوص صفحة الدفع وحدة وحدة، مع أمثلة قبل وبعد تقدر تطبقها اليوم في متجرك على سلة أو زد أو ووكومرس.

ليش العملاء يتركون السلة؟

حسب معهد Baymard، متوسط نسبة السلات المتروكة عالميًا حوالي 70%، يعني تقريبًا 7 من كل 10 سلات ما تكمل للدفع. جزء منها طبيعي، ناس تتفرج أو تقارن أسعار. بس جزء كبير سببه تجربة الدفع نفسها.

من الأسباب اللي رصدها Baymard عند المتسوقين اللي تركوا الطلب:

  • 19% ما وثقوا في الموقع ببيانات بطاقتهم
  • 18% لأن الموقع طلب منهم يسوون حساب
  • 17% لأن خطوات الدفع طويلة أو معقدة
  • 13% لأن سياسة الاسترجاع ما كانت مقنعة
  • 12% لأنهم ما شافوا التكلفة الكاملة للطلب من البداية

لاحظ إن أغلب هذي الأسباب تنحل بكلمات: جملة ثقة، خيار واضح للشراء بدون حساب، سطر يوضح التكلفة. وهنا يجي دور كتابة تجربة المستخدم.

7 نصوص في صفحة الدفع تفرق في المبيعات

1. زر الدفع: قل للعميل وش بيصير

الزر هو آخر قرار. كلمة عامة مثل متابعة تخلي العميل يتردد: متابعة لوين؟ هل بينسحب المبلغ الحين؟

قبل: متابعة
بعد: ادفع 249 ر.س وأكمل الطلب

الرقم داخل الزر يطمّن، لأن العميل يعرف بالضبط كم بيدفع قبل ما يضغط.

2. التكلفة الكاملة: لا تخبّي الشحن للنهاية

أكثر لحظة تقتل الطلب هي لما يتفاجأ العميل برسوم شحن أو ضريبة في آخر خطوة. اكتب التكلفة الكاملة بوضوح من صفحة السلة.

قبل: الشحن يُحسب لاحقًا
بعد: الشحن 25 ر.س لكل مدن المملكة، والسعر شامل الضريبة

3. الشراء بدون حساب: خله خيار واضح

طلب إنشاء حساب قبل الدفع يحس العميل إنه بيلتزم بشي أكبر من طلب واحد. خل الشراء كضيف هو الخيار الأول، واعرض الحساب كميزة بعد الطلب.

قبل: سجّل دخولك للمتابعة
بعد: أكمل الطلب برقم جوالك فقط، وتقدر تسوي حساب بعدين لمتابعة طلباتك

4. رسائل الخطأ: علّم بدل ما تلوم

رسالة الخطأ الغامضة ترجّع العميل خطوة لورا وتخليه يشك في الموقع كله. الرسالة الصح تقول وش الغلط وكيف يتصلح في نفس السطر.

قبل: خطأ في الإدخال
بعد: رقم الجوال لازم يبدأ بـ 05 ويكون 10 أرقام

5. سطر الثقة جنب طرق الدفع

العميل السعودي متعود على مدى وApple Pay وتابي وتمارا. لما يشوفها مع جملة قصيرة تطمّنه، يقل التردد.

قبل: بدون أي نص
بعد: الدفع آمن ومشفّر عبر مدى وApple Pay، وبياناتك ما تنحفظ عندنا

6. سياسة الاسترجاع في سطر واحد

ما يحتاج العميل يفتح صفحة كاملة عشان يعرف حقه. حط الخلاصة جنب زر الدفع، والرابط للتفاصيل.

قبل: اطلع على الشروط والأحكام
بعد: تقدر ترجّع الطلب خلال 7 أيام لو وصلك بعيب

7. صفحة الشكر: كمّل الطمأنة بعد الدفع

تجربة المستخدم ما تنتهي عند الدفع. صفحة الشكر والرسالة اللي توصل الجوال هي اللي تحدد إذا العميل بيرجع لك ثاني ولا لا.

قبل: تم استلام طلبك
بعد: وصلنا طلبك رقم 1042، وبنرسل لك رابط التتبع على الواتساب خلال 24 ساعة

قائمة فحص سريعة لنصوص صفحة الدفع

  • هل زر الدفع يذكر المبلغ والخطوة التالية؟
  • هل تكلفة الشحن والضريبة واضحة من صفحة السلة؟
  • هل الشراء بدون حساب متاح وواضح؟
  • هل كل رسالة خطأ تقول كيف يتصلح الخطأ؟
  • هل فيه سطر ثقة جنب طرق الدفع؟
  • هل خلاصة سياسة الاسترجاع ظاهرة قبل الدفع؟
  • هل صفحة الشكر تقول للعميل وش يصير بعدين؟

أسئلة شائعة عن السلات المتروكة وكتابة تجربة المستخدم

وش هي السلة المتروكة؟

السلة المتروكة هي لما يضيف العميل منتج للسلة ويطلع من المتجر قبل ما يكمل الدفع.

كم نسبة السلات المتروكة الطبيعية؟

حسب Baymard المتوسط العالمي حوالي 70%. نسبتك تختلف حسب نوع المتجر والمنتج، والأهم تقيسها شهريًا وتشوف هل تنزل بعد كل تعديل.

هل تغيير النصوص يكفي لتقليل السلات المتروكة؟

النصوص ما تصلّح سعر غالي أو شحن بطيء، بس تحل التردد اللي سببه الغموض. ابدأ فيها لأنها أسرع وأرخص تعديل، وبعدين شوف الأسباب الثانية.

وش الفرق بين كتابة تجربة المستخدم وكتابة الإعلانات؟

كتابة الإعلانات تجيب العميل للمتجر، وكتابة تجربة المستخدم توصله لنهاية الطلب بدون ما يضيع. الأولى تقنعه، والثانية تسهّل عليه.

وساحرة القلم تقولك

العميل اللي وصل للسلة قال لك نعم مرة. لا تخليه يقول لا بسبب كلمة ناقصة.

لو تبغى أراجع لك نصوص صفحة الدفع في متجرك وأعطيك نسخة جاهزة للتطبيق، تواصل معي على واتساب.

شارك المقالة:

عشان مايفوتك شيء!

اشترك في النشرة البريدية

اشتراك النشرة البريدية

اقرأ بعد :

Scroll to Top